حكايه عمر مناقشه الروايه

 مساء الفل عيد سعيد عليكم جميعا ..عاملين ايه وحكايه عمر حكايتها ايه معاكم ....عمر رايح يخطب وسيله تفتكروا هتوافق ولا هترفض ....فاكرين كلام شهد مع عمر ايه رايكم فيه 

منتهي الازدواجية في شخصيه الرجل الشرقي ...هو يعمل كل حاجه ولحد حد يخصه يموت لو حد قرب منها وعشان كده مقبلش حد يقرب من شهد حتي لو نيته كويسه وده يدل أن عمر عارف كويس أن هو نيته ابدا مش بريئه مع البنات اللي يعرفهم هنا بقي نسأل ياتري الغلط علي عمر ولا علي البنات اللي يعرفهم .....ريم غلطانه اه بس حبيت اطلع شخصيه مش معروف إذا كانت شريرة أو طيبه لا حكم مطلق علي شخصيتها ومش هتكون تقليديه أنها تنتقم من عمر أو من اللي هيتجوزها وخطط ومؤمرات لا مش ناويه علي كده ...بالعكس هي اوقات كويسه واوقات لا ...طيب نحط نفسنا مكانها هي كانت بتحب أو متعلقه بعمر ونديم دخل علي الخط اه غلطت لما أدت نديم امل بس نديم انتقم منها بزياده وبالنسبه ليها دمر حياتها واتفرض عليها وهي حتي لو كانت هتقبل في يوم من الايام كل ما هتفتكر أنها اتجبرت عليه مفتكرش هتقبل انتوا ايه رايكم 

كلنا بنقول أن ام غرام غلطانه والسبب في الورطه اللي غرام رايحه ليها برجليها ودي برضه شخصيه مفتوح الحكم عليها لا نقدر نغلطها كليا ولا نقدر منغلطهاش هي برضه ست افقها ضيق وبلعتها دوامه اعباءالحياه .....غرام غضب عنها عاوزة تبص علي الدنيا وللاسف بتبص من الشباك الغلط ..... ايهم موقفه واضح وصريح عاوز حياه بناته مستقره بس هو راجل له رغبات بيشوف طريقه مشروعه عشان يفرغها وبالتالي بصرف النظر عن أنه صح او غلط إلا أنه الوحيد مسؤل عن تصرفاته 

حلا بنت ايهم شبهه عمر كتير ....الدلع الزياده غلط ولابد من الحزم ( كلنا اتربينا كده علي الخوف من اهالينا ولا طلع عندنا عقد ولا حاجه زي الجيل الجديد ما بيقول وده اللي فسد بسبب التربيه الحديثه اللي للاسف مش بنطبقها صح ) 

ندخل علي محبوب الجماهير مراد ....مش هتكلم عنه كتير ده اللي بنقول عنه لسانه جايبه ورا 🤣

يلا مستنيه رايكم و توقعاتكم للي جاي ولو عندكم سؤال