كل سنه وانتوا طيبين وبخير ....كان نفسي انزل الفصل بس ملحقتش سامحوني اقتباس صغنون ...عيد اضحى مبارك علينا جميعا
زمت وصال شفتيها وهتفت بحنق : بس احنا اتفقنا
رفع هادي حاجبه يتصنع المفاجاه : انا قولتلك هطلقك
هزت راسها هاتفه : أيوة
هز هادي رأسه وهو يقترب خطوة تلو الأخري ببطء بينما عيناه تطوف بملامح وجهها الذي أكسبه الغضب جمالا ليقول وهو مازال يتلبس ثوب الحمل : مقولتش هطلقك ....قولت هسيبك براحتك يعني مجبتش سيره طلاق
ضربت الأرض بقدمها هاتفه بغيظ : قصدك ايه ....انت بتضحك عليا تاني
هز رأسه ورفع يداه للاعلي هاتفا : بريء
وبعترف اني اتفقت معاكي اسيبك براحتك بس مطلعتش مني كلمه طلاق
توقف امامها علي بعد خطوة لتخفض وصال عيناها بعيدا عن مرمي نظراته التي سددها إليها وهو يقطع الخطوة الفاصله بينهم ويميل عليها بطوله الفارع بينما يهمس بحرارة : تفتكري بعد كل كده اقدر ابعد عنك
اقطع لساني قبل ما انطق كلمه طلاق
لامست حراره أنفاسه وجهها وكادت تذيبها حراره قريه ولكنها سرعان ما دفعته بكلتا يديها من امامها وتجاوزته هاتفه بينما تدفع بخصلات شعرها للخلف : هادي بلاش تستفزني
قال هادي بصبر نافذ من عنادها الذي ظن ان له نهايه : فين الاستفزاز ومين بيستفز التاني يابنت الناس ....قول فصل انا مش هطلق ...اي حل تاني موافق عليه
مجددا عاد يقربها إليه لتجد يداه تمسك بكلتا ذراعيها ويجذبها بقوة محببه لتقف أمامه بينما ينظر إلي عيونها قائلا : انتي عارفه اني تاجر والتاجر ميحبش الخساره وانا معنديش اي استعداد اخسرك ...قربي الخساره وبلاش تخسريني كل حاجه
أبعدت يداه عن ذراعها ونظرت له بغيظ هاتفه :
يعني ايه ؟!
رمش باهدابه ولانت حده نبرته بينما سألها دون أن ينظر إليها :
انتي عاوزة تبدأي حياتك مع حد غيري ؟!
طبطبت ثورة نبرتها علي قلبه الذي انجرح وهو يسأل هذا السؤال لتهتف وصال بانفعال :
ايه الي بتقوله ده لا طبعا أنا مقدرش .....بترت جملتها واستدركت هاتفه : مقدرش اخلي ابني يعيش تجربه جوز ام ....اشاحت بوجهها عنه هاتفه : انا هعيش اربي البيبي
لم يستطيع أن يخفي ابتسامته ولكنها سرعان ما التفتت له بغيظ وتابعت : واصلا بعد جوازي منك كرهت الجواز
رفع حاجبه وتقبل ثورتها قائلا : حلو يعني الطلاق مش هيفيدك بحاجه ....مجددا امسك ذراعها ولانت نبرته وهو يتابع : بلاش طلاق وابعدي زي ما انتي عاوزة ...عاقبيني ببعدك بس من غير طلاق ...
بيتك عيادتك عربيتك
قاطعته وصال وهتفت به بغيظ : ماهو كل ده هاخده منك لما اتطلق برضه .....نظر لها لتهز راسها وتتابع :
هاخده منك عشان اغيظك
ضحك هادي وقال برفق : براحتك يا شهد العسل
نظرت له بغيظ هاتفه : متقولش يا زفته الزفت دي تاني !!
مالت وصال تجاه حميده ووضعت يدها علي خدها بينما تقول بمكر محبب : عجبك الاكل يا طنط
قالت حميده بابتسامه : طبعا يا نن عين طنط هو انتي تعملي حاجه وحشه ابدا
لمعت عيون وصال بالمزيد من المكر بينما تقول : غريبه يا طنط مع أنه كله خضار مجمد
ابتلعت حميده ببطء بينما رفع هادي حاجبه ونظر بطرف عيناه الي وصال التي تابعت وهي تشير إلي طبق حميده : وحتي الفراخ يا طنط كمان مجمده
رسمت حميده علي وجهها ابتسامه لم تتوقعها وصال وهي تقول بمجامله زائفه : نعمه ربنا يابتي اهو كله اكل تسلم ايدك علي وقفتك ....!
رفعت وصال حاجبها : بجد
اومات حميده التي سعلت قليلا بينما تقول : معلش يا بتي هتقل عليكي ...هاتيلي كوبايه ميه
اومات وصال وقامت تجاه المطبخ لتزيح حميده ابتسامتها الزائفه وتكشر عن أنيابها هاتفه بأبنها : شوفت بقي يا هادي ...انا اهو براضيها وهي اللي بتجر شكلي وانا ساكته عشانك !!
قراءه ممتعه بقلم رونا فؤاد
أترك تعليقا لطيفا يذكرني بك