حكايه عمر اقتباس

 عقدت حاجبيها باستفهام ليتابع ايهم : ده الصح ... مالكيش مكان هنا ومكانك في بيت أهلك ....انتي غلطتي وهما مهما يكون زعلهم منك الا انك في الاخر بنتهم ووالدتك اكيد هتسامحك لأنها ام في الاول والاخر 

انسابت دمعه من عيون غرام وهي تهز راسها مردده بقهر : مش هتسامحني !

قال ايهم بثبات حتي لا يتأثر بدموعها بينما رأي أنها في النهايه كانت مجرد فتاه صغيرة دمرت حياتها بيدها وهي تركض خلف اوهام ....واستغلت شيطانه كعزه عدم خبرتها في الحياه فاوقعتها في شرك كبير لا خروج منه إلا بنزف المزيد من الدماء !

: هتسامحك ....!

نظرت له برجاء قبل أن تخفض عيناها وهي تستجديه بتوسل : لو اتجوزتني رسمي جايز ...قاطعها ايهم بحزم وهو يرفض أن يتأثر بتوسلها فيشفق عليها ويتخذ قرار يدرك جيدا أنه لن يؤدي إلا الي المزيد من دمار حياتها 

: قولتلك مستحيل 

قام من مقعده واتجه ليقف امامها ويجبر عيناها أن تنظر إليه : انا اه عرفت الحقيقه بس قولتلك مفيش حاجه اتغيرت ....خدعوكي اه بس انتي اللي خدعتي نفسك الاول ....انتي غلطتي ولازم تتحملي نتيجه غلطك ...عزه غلطت وانا هحاسبها ...سحب نفس عميق وزفره بحنق قبل أن يتابع بإقرار : وانا كمان غلطت 

كل واحد غلط هيحاسب علي غلطته ويتحملها بطريقه .... !

غص حلق غرام بقوة ليزداد جريان دموعها الحاره علي وجنتيها بينما تقول بصوت متحشرج : كلكم هتتحملوا نتيجه غلطكم وتكملوا حياتكم كأن مفيش حاجه حصلت و انا الوحيده اللي حياتي اتدمرت 

استندت الي المقعد لتساعد جسدها الواهن علي الوقوف أمامه لتنظر الي عيناه القاسيه وتتابع بصوت باكي : انت هتكمل حياتك وانا هبقي مجرد يوم عدي في حياتك ....هتفضل الضابط والاب المحترم في عيون الكل 

...و عزه هتكمل حياتها وتخدع بنات تانيه وتدمر حياتهم وتبيع وتكسب من وراهم طول ما في ناس زيك بتشتري منها ....اختنق صوتها بالبكاء أكثر وهي تنكس راسها وتتابع : انا عارفه اني غلطت وماليش عذر ولا مبرر عشان كده استاهل كل اللي يجرالي ...استاهل بصتك المحتقره وكلامك المهين ...استاهل اعيش في الشارع عشان اتبطرت علي بيتي وعيشتي مع أمي اللي فهمت دلوقتي خوفها الزايد عليا من أمثال عزه وفيفي ....انا عارفه اني مش فارقه معاك وانك شايفني مجرد بنت زباله اشتريتها ...تحشرج صوتها وازدادت شهقاتها بينما تتابع وهي تضع كلتا يداها علي وجهها الذي غرق بدموعها : انا استاهل بس امي متستاهلش ابدا اللي عملته فيها 

حرك ايهم يداه علي وجهه يحاول أن يمحي تأثر ملامحه بندمها الذي في محله تحركت شفقته ناحيتها وحاولت أن تثنيه ولكن كل عقله يخبره أن هذا هو الصواب !

مسحت غرام وجهها بيدها تحاول ايقاف دموعها بينما ترفع رأسها ناحيته ببطء وهي تهز راسها تقر بكلامه : انت عندك حق ....كل واحد يتحمل نتيجه غلطته !

قراءه ممتعه بقلم رونا فؤاد

ايه رايكم و توقعاتكم