بساط السعاده اقتباس

 نظرت تلك المراه ذات القوام الممتلئ تجاه نجاه الجالسه قبالتها بينما تتابع : انا مش هتنازل عن غويشه حصيره حلاوتي 

لمعت عيون نجاه واتسعت ابتسامتها بينما تهتف بلهفه : غويشتين مش واحده بس يا اصيله لو حقه كان هادي من نصيب شروق 

تلاشت ابتسامه اصيله ونظرت الي نجاه مصححه : شروق ايه سلامه ودانك يا نجاه بقولك العين والقصد علي مروة بنت اختك الله يرحمها 

استنكرت نجاه هاتفه : وهي مروة وشروق ايه ماهما واحد 

اومات اصيله قائله وهي ترفع حاجبها : وعشان كده انا جايه في الأصول الكبيرة قبل الصغيرة 

لوت نجاه شفتيها وهتفت بامتعاض : بس انا كبيرتي هي شروق 

نظرت لها اصيله بخبث : ومروة مش تعتبر كبيرتك اللي ربتيها بعد ما اختك ماتت الله يرحمها 

هزت نجاه راسها قائله : ربتها وكبرتها وصرفت عليها زي بناتي بالضبط بس ...قاطعتها اصيله بضحكه ماكرة : بس عاوزة الخير لبنتك اكتر 

اشاحت نجاه بوجهها للجهه الأخري هاتفه : وماله ماهو مهما كان شروق بنتي ومروة لا 

حكت اصيله ذقنها وتمهلت بينما تقول : بس انا كنت كلمت الست حميده علي مروة لما طلبت مني عروسه لابنها دلوقتي اغير كلامي واقول شروق ازاي 

بلا تردد خلعت نجاه احدي الغوايش من يدها ووضعتها بحجر اصيله تغريها ببريق الدهب بينما تهتف بتشجيع : وهو انتي هتغلبي ...انتي برضه ليكي طريقتك وكلامك واهو شروق بنتي حلوو و متعلمه ومروة يا دوب دبلوم وجمالها يعني مش علي اد كده 

نظرت اصيله الي الغويشه بتمهل وهي تتظاهر بالتفكير : طيب سيبيني كده ادورها في دماغي وارد عليكي 

نظرت إلي نجاه وتابعت بطمع : بس الغويشه دي ...قاطعتها نجاه قائله بلهفه : دي برا حلاوتك اللي وعدتك بيها بس انتي همتك معايا وحلي شروق في عنين الست حميده وخليها تاخدها لابنها هادي 

اسرعت شروق تخرج من غرفتها راكضه ما أن غادرت اصيله الخاطبه لتقفز مكانها بفرحه : بجد يا ماما الكلام اللي سمعته ....؟!

نظرت نجاه الي ابنتها بحاجب مرفوع : سمعتي ايه ؟!

رسمت شروق الخجل بينما تقول : أن ...أن يعني ...أنها جايه تخطبني لابن الست حميده 

ضحكت نجاه ساخره : ده بس اللي سمعتيه....مستمعتيش أنها كانت جايه تتكلم علي مروه 

عقدت شروق حاجبيها باستنكار وملئت الغيرة نظراتها مردده : مروة 

اومات نجاه وهي تمصمص شفتيها : شوفي البخت 

هزت شروق راسها برفض : بخت ايه يا ماما ....لا طبعا مستحيل مروة تتجوز قبلي وكمان تتجوز واحد زي ده ....هادي لازم يكون من نصيبي 

جلست نجاه وعضت جانب شفتيها بحيرة قائله : اهو انا عملت اللي عليا وعطيت اصيله غويشه بحالها ووعدتها باتنين زيها اياك تفلح 

قالت شروق بأمل : هتفلح أن شاء الله.....مالت لتجلس بجوار والدتها وتابعت بخبث : المهم البت اللي اسمها مروة اياك تسمع حاجه عن الموضوع ده احسن تاخده مني 

قالت نجاه متبرطمه : يبقي تخرسي انتي وتلمي لسانك واياك تتكلمي خالص عن أي حاجه حصلت لغايه ما اصيله تجيب ليا البشاره 

اومات شروق بتأكيد : حاضر يا ماما 

وكزتها نجاه من جوارها قائله : طيب يلا قومي جهزي الغدا ابوكي زمانه علي وصول 

هزت شروق راسها وقامت لتسير بضع خطوات قبل أن تقضم أظافرها ثم تعود الي والدتها قائله  : ماما 

نظرت نجاه لها لتتابع بغل وغيره : لو حتي الست اصيله معرفتش تخليه يتجوزني يبقي ولا ليا ولا لمروة ....خليها تبوظ الجوازه بأي طريقه !!

ايه ده يا خالتي بتعملي ايه ؟!

قالت نجاه ببرود بينما افترشت الغرفه بكل تلك الحقائب تخرج محتوياتها والتي كانت جهاز مروة الذي كانت والدتها رحمها الله تجهزها به منذ أن كانت طفله : معلش يا مروة يا حبيتي هاخد شويه حاجات من جهازك لأختك شروق ...انتي عارفه فرحها قرب وانا ملحقتش اجيب كل حاجه 

غص حلق مروة دون إرادتها فهو جهازها من رائحه والدتها لتقوم نجاه ناحيتها وتهتف بود مصطنع : هبقي اجيبلك غيره 

حاولت مروة أن تنطق شيء بصوتها المتحشرج : بس ماما الله يرحمها كانت جيباه ليا  ...قاطعتها نجاه قائله 

وهي تزفر بضيق : ما قولتلك هجيبلك غيره ولا يعني بنتي تدخل من غير جهاز يليق بعيله جوزها !

قراءه ممتعه بقلم رونا فؤاد 

ايه رايكم و توقعاتكم 

عاوزين اقتباس لهادي ووصال متقدم شويه ولا تستنوا